Icewear gerir upp elsta verslunarhúsnæðið við Laugaveg

Verslunarsaga Reykjavíkur á sér djúpar rætur á Laugavegi 1, þar sem hún blómstrar enn meira en öld síðar. Verslunin Icemart, sem er í eigu Icewear, hefur haft aðsetur í húsinu frá árinu 2015 og nú stendur Icewear fyrir miklum endurbótum á byggingunni í nánu samstarfi við Minjastofnun Íslands.

Elsta verslunarhúsnæðið við Laugaveg

Laugavegurinn sjálfur á sérstakan stað í sjálfstæðisbaráttu þjóðarinnar þegar íslenskir kaupmenn fóru að versla þar sem andsvar við yfirráð útlendinga í Kvosinni en síðan þá hefur gatan aldrei staðið kyrr. Húsum hefur verið breytt, þau flutt eða rifin og ný byggð í þeirra stað. Í dag má finna sýnishorn af nær öllum byggingarstílum sem þekktir eru á Íslandi síðustu 140 árin en á þeirri götu má finna Laugaveg 1.   

Laugavegur 1 á sér sérstakan sess í sögu Reykjavíkur þar sem það er meðal elstu húsa borgarinnar og annað elsta sem enn stendur austan lækjar. Húsið var meðal veglegri íbúðarhúsa landsins og heimili valdamikilla manna í næstum hálfa öld.  

1848  

Þýski trésmiðurinn og málarinn Gustav Ahrenz reisir Laugaveg 1, fyrsta húsið sem byggt er við götuna. Ahrenz hafði áður unnið að stækkun Dómkirkjunnar og byggði meðal annars Lækjargötu 4, sem nú stendur í Árbæjarsafni, og Hollensku mylluna í Bakarabrekkunni. Húsið er talið nr. 2B á Arnarhólslóð í fyrstu og telst eitt af stærri húsum landsins á þessum tíma, þegar þorri almennings bjó enn í torfbæjum. Laugavegur 1 er byggt úr bindingsverki, hlaðið upp með múrsteini og holtagrjóti, klætt timbri að utan og með ferhyrndum steinhellum á þaki.  

1850

Jón Pétursson yfirdómari, síðar dómstjóri, kaupir húsið og flyst þangað með fjölskyldu sinni. Næstu hálfa öld gengur húsið undir nafninu Assesorshúsið.   

1864

Jón yfirdómari byggir litla viðbyggingu á norðurhlið hússins, sem stendur óbreytt um árabil.

1898

Í lok aldarinnar hefur húsið yngst upp. Gömlu sexrúðugluggarnir hafa vikið fyrir krossgluggum, þrískiptur krossgluggi er kominn á framhlið og bárujárn hefur leyst timburklæðninguna af hólmi. Steinhellurnar á þakinu halda sér þó áfram langt fram á 20. öld.

1903

Verslun flytur inn í húsið, sú fyrsta sinnar tegundar við Laugaveg. Þar með hefst óslitin verslunarsaga sem stendur enn í dag.  

1915   

Verslunin Vísir hefur starfsemi sína á Laugavegi 1 og verður þar samfellt í heila öld.  

2015

Vísir lokar eftir hundrað ára samfellda starfsemi á sama stað. Verslun heldur þó áfram í húsinu þar sem Icemart flutti í húsið og Laugavegur 1 er enn í dag fyrsta og elsta verslunarhúsnæði götunnar.  

Framtíðaráform

Icewear, í samvinnu við Minjastofnun Íslands, endurreisir húsið með virðingu fyrir sögu þess. Upprunalega húsið mun fá að njóta sín að nýju og aftar á lóðinni mun rísa nýbygging með verslun í kjallara og fyrstu hæð ásamt gistiíbúðum á annarri hæð.  

Þannig mun nýr kafli í sögu hússins hefjast þar sem fortíð og framtíð mætast og Laugavegur 1 mun halda áfram að vera hluti af lifandi verslunargötu.